Tagalog News: Mga nars ng Tabuk nagsanay ukol sa nutrisyon
- Published on Wednesday, 04 January 2012 13:42
- Category: National
ni Gigi Dumallig
TABUK CITY, Kalinga,Enero 4(PIA) -- Nagkaroon ng pagsasanay kamakailan ang mga nars sa mga pampublikong paaralan ng lungsod ng Tabuk upang maipamahagi sa kanila ang mga impormasyon at kaalaman ukol sa pagbibigay ng tamang nutrisyon para sa mga bata.
Ayon kay Provincial Nutritionist Frances Sebastian, importante ang papel ng mga narses sa paaralan sa pagbabahagi ng mga impormasyon ukol sa nasabing paksa sa mga mag-aaral, guro at sa mga magulang.
Sa kanilang pagsasanay, sa pamamagitan ng modular na paraan dumaan ang mga nars sa mga lectures at demonstrations sa mga paksa ng Infant and Young Child Feeding, Pabasa sa Nutrisyon at Oriented on the Nutrition Guidelines for Filipinos, para mapag-aralan nila ng masinsinan ang mga importanteng bagay upang sila ay maging epektibo sa pagtuturo.
Ayon kay Sebastian, ang nga batang Kalinga tulad ng nakakaraming Pilipino ay nakakaranas rin ng malnutritsyon dahil sa maling kasanayan o walang kaalaman sa tamang pagkain o kaya’y salat sa buhay at hindi makabili ng pagkain.
Upang bigyan pansin ang naturang problema, itinala ng gobyerno ang Accelerated Hunger Mitigation Program (AHMP) kung saan isa sa mga pangunahing bahagi nito ay ang “Promote Good Nutrition” sa pamamagitan ng pagbibigay kaalaman sa publiko ukol sa tamang pagpili ng pagkain para sa mga pamilyang Pilipino.
Sa pamamagitan ng mga nars, ang sector ng pangkalusugan ay nais matugunan ang pagtaas ng kaalaman ng mga pamilyang Pilipino ukol sa ano ang dapat kinakain at kung paano ito maaring itanim at palaguin sa kanikanilang mga bakuran, ani Sebastian.
Ang Kalinga aniya ay nilikha na may masaganang lupa, at sa tamang kaalaman, ang kada- pamilya ay maaring gamitin ito upang makapaglago ng pagkain sa pamamagitan ng pagtatanim at pag-aalaga ng hayop. Sa pamamagitan nito ay masisigurado na may pagkain sa kanilang hapag-kainan sa araw-araw. Ito aniya ay maari ring makatulong bilang dagdag hanap-buhay ng pamilya. Ang pagtatanim ng gulay sa bakuran aniya ay maari ring gawin sa mga eskwelahan.
Sa mga programang ito, kinakailangan aniya na maki-bahagi ang mga bata sa mga gawain upang lalo nilang bigyan halaga ang importansya ang tamang pagkain at pagpapalago nito.
Isa sa mga adhikain ng naturang pagsasanay ay upang maipatupad ang World Health Organization feeding practices lalo na sa mga bata at upang matuto ang bawat pamilyang Pilipino na pahalagahan ang sa tamang nutrisyon at pagpapalago ng pagkain sa kanilang mga bakuran sa halip na bumibili sila nito. (JDP/GGD- PIA CAR, Kalinga)
